Австриянинг Ҳохфильцен шаҳарчасида давом этаётган биатлон бўйича жаҳон чемпионатининг эркаклар ўртасидаги эстафета мусобақаси ғолибларини тақдирлаш маросимида кутилмаган томоша юзага келди.

Гап шундаки, пойгада ғалаба қозонган Россия терма жамоаси шоҳсупага чиқиб медалларни қўлга киритгач, ғолиб мамлакат шарафига мадҳия янграши керак эди. Бироқ австриялик ташкилотчилар Россия мадҳиясини адаштириб юборишди. Шунда шоҳсупа яқинига чиқиб келган Матч ТВ шарҳловчиси Дмитрий Губерниев микрофонни қўлга олган ҳолда спортчиларни мадҳияни жонли айтишга чорлади. Ғолиблар (Алексей Волков, Максим Цветков, Антон Бабиков, Антон Шипулин) мадҳияни жўр бўлиб ижро этишди. Губерниев эса уларга ўзига хос дирижёрлик вазифасини ўтаб берди. 

Эслатиб ўтамиз, эстафетада, Россия терма жамоаси маррага биринчи бўлиб етиб келган бўлса,Франция иккинчи, Австрия терма жамоаси эса учинчи ўринни қўлга киритди.

Эртага жаҳон чемпионатининг сўнгги кунида эркаклар ва аёллар ўртасидаги масс-старт баҳслари бўлиб ўтади. Унда энг яхши 30 нафардан аёл ва эркак биатлончилар олтин медал учун кураш олиб боришади.