Эквадор фуқаролари 19 февралда мамлакатда ўтадиган сайловларнинг 1-босқичида кейинги 4 йилга президент сайлашади. Шунингдек, мамлакат парламентига ҳам янги депутатлар сайланди.       

Бу охирги 10 йил ичида мамлакатнинг амалдаги президенти Рафаэль Корреа иштирок этмаётган илк сайловлар бўлади. Бироқ у сайловолди кампаниясида фаол иштирок этиб, "ПАИС альянси" блокидан номзод, собиқ вице-президент Ленин Моренони қўллаб-қувватлади.  

Мамлакат президенти лавозимига 1998 йилдан бери ногиронлар аравачасида ҳаракатланадиган Моренодан ташқари яна 7 номзод кураш олиб боради. Бироқ кузатувчиларнинг фикрича, улардан икки нафари президент бўлишга ҳақиқатда реал имкониятларга эга. Булар собиқ банкир Гильермо Лассо ва социал-христиан партияси вакили Синтия Витери.

Сайловларда 50 фоиздан кўпроқ овоз тўплаган номзод автоматик равишда президент бўлади. Агар номзод 1-босқичда 40 фоиздан кўпроқ овоз билан ўз ортидан келаётган энг яқин рақибидан 10 фоиз кўпроқ овоз тўпласа ҳам президент бўла олади. Қолган бошқа вазиятларда 2-босқич ўтказилади.

Охирги маълумотларга кўра, мамлакатда 12,8 млн киши овоз бериш ҳуқуқига эга. Эквадорда сайловлар 18 ёшдан 65  ёшгача бўлган барча учун мажбурийдир. Сайловларда иштирок этмаганлик учун жарима кўзда тутилган ва унинг миқдори 37,5 долларни ташкил қилади.