Исроил Мудофаа вазири Авигдор Либерманнинг ҳисоблашича, Эрон ва унинг ядровий амбициялари Яқин Шарққа таҳдид солиб турибди. Бу ҳақда у Мюнхенда ўтказилган хавфсизлик масалаларига бағишланган конференция чоғида маълум қилди.

"Яқин Шарқда биз уч муаммога дуч келамиз: Эрон, Эрон ва яна Эрон", деган у.

"Биринчиси, Эроннинг ядровий амбициялари, баллистик ракеталарни такомиллаштириш дастури, шунингдек, Яқин Шарққа (Яман, Ливан ёки Сурия) қурол-яроғ олиб кирилиши", деган вазир.

У иккинчи таҳдид сифатида Теҳронни Яқин Шарқдаги давлатларда беқарорлик юзага келтиришда айблаган. "Булар Баҳрайн, Яман, Ливан, Сурия. Лекин бугунги кунда Эроннинг биринчи нишони - Саудия Арабистони", дея қўшимча қилган у.

Исроиллик вазирнинг сўзларига кўра, "учинчи муаммо - бу Эроннинг ўзини тутиши". Унинг фикрича, Эрон Яқин Шарқда радикал гуруҳлар билан иттифоқ тузган. "Ливанда "Ҳезболлоҳ" (шиалар - таҳр.) бор, Ғазо секторида "Жиҳодчилар" ва ҲАМАС, Яманда ҳусийчилар, Ироқда шиа бўлинмалари", деган Либерман.

Эрон ташқи ишлар вазири Муҳаммад Жавад Зариф Мюнхендаги хавфсизлик конференциясида сўзлаган нутқида Эроннинг ядровий дастури тинчликпарварликка асосланганини таъкидлади.

"Барча бир йилда ядровий қуролни яратиш учун бизнинг қудратимиз етарли эканлигини айтади, бироқ мен аниқ ва равшан қилиб маълум қиламанки, ядровий қурол ҳеч қачон бизнинг хавфсизлигимиз учун хизмат қилмайди, у бирорта мамлакатга ёрдам бермайди. Ҳозир ядровий қурол эгалари клубига қўшилиш эмас, қуролнинг бу туридан халос қилиш вақти", - дея қўшимча қилди у.