Шимолий Корея президентининг Малайзияда ҳалок бўлган акаси Ким Чен Намнинг оила аъзолари унинг танасини олиб кетиш учун шахсан ташриф буюришлари керак бўлади. Мазкур талабни бажариш учун марҳумнинг қариндошларида икки ҳафта вақт бор. Бу ҳақида Рёнхап агентлиги Малайзия полицияси вакиллари берган маълумотга асосланиб, хабар берди. 

Бундан аввал тергов Ким Чен Намга суиқасд қилган гумондорларни аниқлагани ҳамда уларнинг КХДР фуқаролари экани маълум қилинган эди. Гумондорларнинг барчаси дипломатик эмас, оддий паспорт соҳиблари бўлган. Полиция маълумотига кўра, улар Малайзияга турли вақтларда парвоз қилган бўлса-да, мамлакатни бир кунда, яъни Ким Чен Намнинг ўлими куни тарк этишган. Тергов уларнинг қайси йўналишда учиб кетганини ошкор қилишни истамади. Малайзия полицияси уларни қўлга олиш учун Интерпол билан ҳамкорлик қилмоқда. 

КХДР раҳбарининг акаси айнан нима сабабдан ҳаётдан кўз юмгани  экспиртиза натижаларидан кейин маълум бўлади. Тахминларга кўра, Ким Чен Нам заҳарланган. Тергов жасаднинг ҳануз "расман тан олинмагани"ни таъкидлаб, унинг яқинларини жараёнга ҳамкорлик қилишга чақирган. 

Ким Чен Нам 13 февраль куни оиласи ёнига, Макаога йўл олган вақтида ҳаётдан кўз юмган. Терговчилар суиқасднинг воқеа жойидан яширинишга улгурган икки аёл томонидан уюштирилганини тахмин қилишмоқда.