Россия ТИВ раҳбари Сергей Лавров маълум қилдики, «ДХР» ва «ЛХР» фуқаролари ҳужжатлари Минск келишувлари бажарилмагунига қадар Россияда тан олиниши давом этади.

18 февраль куни Россия президенти Владимир Путин Россия «Донецк халқ республикаси» («ДХР») ва «Луганск халқ республиксаси» («ЛХР») маъмурияти томонидан берилган шахсни тасдиқловчи ҳужжатларни ҳақиқий деб тан олиш ҳақидаги фармонини имзолади.

Паспортлардан ташқари, «ДХР» ва «ЛХР»нинг таълим олганлик ҳақидаги ҳужжатлари, туғилганлик ва ўлим, никоҳ қайд этилгани ва никоҳ бекор қилингани ҳақидаги гувоҳномалари, шунингдек, давлат автомобиль рақамлари ҳам Россия томонидан ҳақиқий деб тан олинган.

Энди «ДХР» ва «ЛХР»да берилган ҳужжатлар асосида Россия ҳудудига қонуний кириш мумкин.

Фармонга кўра, «ДХР» ва «ЛХР» паспортлари вақтинча — Донбассдаги низо ҳал этилгунига қадар тан олиниб туриши айтилганди.

Лавровнинг қайд этишича, бу масала Мюнхенда ўтган «норманд тўртлиги» учрашувида кўтарилмаганди.

«Бундай гуманитар чора Минск келишуви бандлари бажарилмагунига қадар амалда бўлади,… президент фармони Донбасс фуқаросини билдирувчи ҳужжатга эга шахслар Россияга қонуний ўтиши, темир йўл ва авиация транспорти орқали Россия Федерацияси бўйлаб ҳаракатланишига рухсат беради», — деган Лавров журналистларга.

Украина президенти Петро Порошенко Россия айирмачиларга тегишли ҳужжатларни тан олишини халқаро ҳуқуқбузарлик деб атаган.