Германия 2017 йилда мудофаага харажатларини 8 фоизга оширади. Бу ҳақда 20 февралда НАТО бош котиби Йенс Столтенберг АҚШ вице-президенти Майкл Пенс билан берган матбуот-анжуманда айтиб ўтди.

"Германия жорий йилда ўз ҳарбий харажатларини 8 фоизга оширади, бироқ ялпи ички маҳсулотнинг 2 фоизлик кўрсаткичига эришиш учун катта йўлни босиб ўтиш керак", деб айтган Столтенберг.

Столтенберг Пенсга Европа давлатлари ҳарбий харажатларини фаол оширишларига ваъда берди.

2016 йилда Германиянинг ҳарбий харажатлари унинг ЯИМининг 1,15 фоизини ташкил қилган. Айни вақтда АҚШдан ташқари, НАТОга кирувчи 28 та давлатдан бор-йўғи учтаси – Буюк Британия, Греция ва Эстония ўз ҳарбий харажатларини ЯИМнинг 2 фоизига етказишган.  

НАТО мудофаага харажатларнинг оширилиши заруратини "шарқдан", яъни Россия томондан "таҳдид борлиги" билан тушунтирмоқда.