КХДРнинг Малайзиядаги элчиси Кан Чол Куала-Лумпур аэропортида Ким Чен Намнинг ўлдирилиши бўйича мамлакатда олиб борилаётган терговга ишончсизлик билдирди.

Элчининг айтишича, ўлдирилган шахс КХДР етакчиси Ким Чен Иннинг акаси эмас, унинг исми-шарифи Ким Чол.

«Бу воқеага бир ҳафта бўлди. Бироқ ўлим сабаблари ҳақида ҳеч қандай далил тақдим этилмади, биз малайзияликлар полициясига ишона олмаймиз. Элчихона ўлдирилган кишининг шахсини аниқлади — у КХДР фуқароси Ким Чол», — деган элчи.

Бундан олдинроқ элчи КХДР ҳукумати Малайзияда вафот этган Шимолий Корея фуқароси жасадининг ёриб кўрилиши натижаларини ушбу жараён КХДР вакиллари иштирокисиз ўтказилгани туфайли тан олмаслигини билдирганди. У шунингдек, марҳумнинг жасади зудлик билан шимоллик корейсларга топширилиши зарурлигини маълум қилганди.