Қозоғистон Республикаси Парламент мажлисида таълим ва фан вазири Ерлан Сагадиев мактаб ўқувчиларига бериладиган уй вазифалари ҳажмининг камайтирилиши ҳақида маълум қилди. Zakon.kz сайтида шу ҳақида хабар берилди. 

"Бизнинг мактаб ўқувчиларимизнинг уй вазифаларини бажаришга кетадиган вақт 65 мамлакат ичида 4-ўринни эгаллайди. Ҳалқаро таҳлил уй вазифалари ҳажми ва таълимдаги ютуқлар орасида тўғридан-тўғри боғлиқлик йўқлигини кўрсатади. Ўқув жараёнини тўғри шакллантириб, уй вазифасини қисқартириш мумкин ва керак", - деди у. 

Идорада таъкидланишича, бу масала юзасидан ўқитувчи ва мутахассислардан иборат икки йирик гуруҳ иш олиб борган. 

"Бу ерда икки хил вариант таклиф қилинмоқда. Биринчиси - барча предметлар бўйича уйга вазифа бериш, лекин камроқ. Иккинчиси - уйга вазифа бериш, лекин барча предметлардан эмас", - дея маълум қилди Е.Сагадиев. 

"Икки ҳолатда ҳам уй вазифаси кунига ўртача бир соатга қисқартирилади, дам олиш кунларига уйга вазифа берилмайди. Бугун бу масала педагог ва ота-оналар муҳокамасига қўйилган. Шундан келиб чиққан ҳолда бир хулосага келинади", - дея сўзларини якунлади вазир.