Ogoh bo‘ling: MDH mamlakatlarida «ko‘k kit» o‘yini

So‘nggi vaqtlarda (aniqrog‘i, yanvar oyidan e'tiboran), xalqaro maydondagi yangiliklarni kuzatib borayotgan bo‘lsangiz, MDHning qator mamlakatlari, xususan, Ukraina, Qozog‘iston, Rossiya va Qirg‘izistonda o‘smirlar o‘rtasida o‘z joniga suiqasd qilish hollari ko‘payib borayotgani haqida bong urishmoqda. Xo‘sh, ularning bunday qaror qabul qilishlari va yosh umrlarini xazon qilishiga nima sabab bo‘layapti? 

Shunday noxush voqealardan biri bir necha soatlar muqaddam Ukrainada sodir bo‘ldi. Xabarlarga ko‘ra, o‘smir qizning o‘limoldi maktubini topib olgan ona politsiyani xabardor qilgan. Kiyev shahar politsiyasi, milliy gvardiyaning jiddiy sa'y-harakatlari tufayli qiz 16 qavatli turarjoy binosining tomidan topilgan. U yordamga muhtoj holatda, tanasining turli qismida pichoq bilan yetkazilgan yangi va eski jarohat joylari bo‘lgani holda topilgan.

Uning suiqasd qilishga urinishidan avval ijtimoiy tarmoqlardagi «o‘lim guruhlari»ga a'zo bo‘lgani, «suiqasd qilish» kitoblarini o‘qigani, oxirgi topshiriqdan so‘ng, bu kabi guruhlarni tark etgani aniqlangan. 

Ma'lumotlarga qaraganda, turli (asosan, VKontakte) ijtimoiy tarmoqlarda «ko‘k kit» nomi bilan razil g‘arazgo‘ylar guruhi mavjud. Ularning soni bitta emas, bir nechta ekani ham ma'lum. Achinarli va tashvishlisi shundaki, ularning g‘alamisliklariga chuv tushayotganlar hayotning achchiq-chuchugi nima ekanini bilmaydigan va dunyoqarashi shakllanish arafasida bo‘lgan o‘smir yoshlardir. Rossiya, Ukraina, Qozog‘iston va Qirg‘izistonning har birida kamida 15 nafar o‘smir ushbu o‘yin qurboni bo‘lishga ulgurgan. 

Ushbu o‘yinni o‘ynab ko‘rgan Kun.Uz manbasining so‘zlariga ko‘ra, «o‘lim guruhi»ga a'zo bo‘lgach hamda o‘yinga o‘smirning roziligi olingach, unga turli topshiriq berila boshlanadi. Xususan, manbaga birinchi kunlik topshiriq sifatida «Xudo»ning suratini chizish topshirilgan. Mana shuning o‘ziyoq, aslida bunday guruhlar ortida qanday kuchlar yotganini isbotlaydi. Manbaga, shuningdek, serqatnov ko‘chadan avtomobillar yaqin qolganida yugurib o‘tish va bu jarayonni bevosita videotasvirga  olish, tanasiga turli suratlarni pichoq vositasida kesish yo‘li bilan solish va shu kabi topshiriqlar berilgan. Topshiriqdan biri ular yuborgan musiqani 3 kecha-kunduz tinimsiz tinglab yurish bo‘lgan. 

E'tiborli jihati shundaki, guruh administratorlari o‘smirlarni nazoratida ushlab turish uchun topshiriqni bajargan yoki bajarmaganiga doir suratni o‘ziga yuborishni talab qilishadi. Kun.Uz manbasining so‘zlariga ko‘ra, «o‘lim guruhi» unga suiqasd qilishiga turtki berish maqsadida, «u dunyo borligiga ishonsang, bilki, sen gunohkorsan, agar sen o‘zingni o‘ldirmasang, sen uchun ota-onang jazolanadi, o‘zingni o‘ldirsang, ular qutulib qolishadi, nahotki, sen ularni yomon ko‘rsang» kabi aldovchi so‘zlarni ham bildirishgan. Albatta, manbaning ta'kidlashicha, u bu kabi vazifalarni bajarmagach, unga tahdid qilishgan va oxirida aloqani uzishgan.

Xo‘sh, tahdid qanday amalga oshiriladi? Ular maxsus dastur orqali foydalanuvchining IP manzilini aniqlab, uning uy manzilini bilib olishadi va shu orqali, «sen shu manzilda yashaysan, shartni bajarmasang oilang bilan yo‘q qilamiz, orqaga yo‘l yo‘q, bajarishing shart», deya shantaj qilishadi, yo bo‘lmasa, o‘yin davomida ishtirokchining turli xil shaxsiy (intim mazmuniga egalari ham) suratlari aldov yo‘llari bilan olinadi hamda so‘nggi bosqichda suiqasdga majburlash vositasida qo‘llaniladi. 

Ammo, bu kabi g‘alamislarning buzuq niyatlariga chuv tushayotganlar oz emasligini xalqaro yangiliklar dasturlarida ko‘rish mumkin. «O‘lim guruhi»ning topshirig‘i esa, asosan, ertalabki shirin uyqu vaqtida, tonggi 4:20-4:50 atrofida berilishi ta'kidlanmoqda. Ularga so‘nggi vazifa berilishida, shuningdek, «bu tush ekani, shartni bajarishi bilan uyg‘onishi va natijasi qanday bo‘lganini bilish mumkin»ligi kabi gipnoz usullaridan foydalanilgani ham xabarlarda aytilmoqda. 

Xulosa o‘rnida aytmoqchimizki, maqsadimiz boshqa mamlakatlarda bo‘layotgan bu kabi salbiy voqea-hodisalar yurtimizga kirib kelmasin! Buning uchun esa, barcha, ota-onalar, mahallalar, keng jamoatchilik, ta'lim maskanlari va profilaktika inspektorlari hushyor bo‘lishi lozim. O‘smir yoshlar orasida tushuntirish ishlarini olib borish kerak.