Pagani фирмаси янги суперкарини намойиш қилди. Гап Huayra деб ном олган родстер ҳақида кетмоқда. Автомобилнинг расмий премьераси Женевадаги халқаро автосалон доирасида бўлиб ўтади. 

Родстер 2010 йилда конвейердан чиққан купе базасида қурилган. Автомобиль битурбирланган, 746 от кучига эга V12 двигатели билан жиҳозланган. Купедан фарқли равишда, усти очиқ родстернинг кузови енгилроқ, уни яратишда янги Carbo-Triax HP52 материали қўлланган.

Ҳаммаси бўлиб 100 та шундай машина ишлаб чиқарилади. Машиналар 2,4 млн доллардан сотилади.  

Фото: Pagani

Pagani Automobili гиперкарлар ишлаб чиқарувчи итальян фирмаси бўлиб, 1992 йилда ташкил топган. Унинг бош қароргоҳи Италиянинг Модена шаҳрида жойлашган. Фирма кўп йиллардан бери Daimler AG компаниясининг спорт моделлари ишлаб чиқарувчи AMG бўлими билан ҳамкорлик қилади.