Ким Чен Намни йўқотишнинг бош омили КХДР етакчиси Ким Чен Иннинг ўз ҳокимиятини мустаҳкамлашга уриниш билан изоҳланиши мумкин. Корея республикаси бирлашув вазири Хон Ён Пхё хорижий журналистлар учун Сеулда ўтказган матбуот анжуманида шу ҳақда сўз юритди. 

"Ким Чен Намнинг ўлдирилиши «террор ҳокимияти» ҳисобланган Ким Чен Ин тузуми ҳаракатларига мос келади. Ин ўз ҳокимиятини мустаҳкамлаш учун унга таҳдид солиши мумкин бўлган барчани йўқотмоқда", - деган вазир.

Хон Ён Пхёнинг фикрича, Ким Чен Намнинг ўлимида "кўплаб гувоҳликлар, хусусан разведка маълумотлари Шимолий Корея қўли борлигини кўрсатмоқда". Бироқ, вазир махфийлиги сабабли далилларни келтирмаган. 

Жанубий Корея бирлашув вазирининг айтишича, "Ким Чен Намнинг ўлими яқин истиқболда Ким Чен Инга ёрдам беради, аммо узоқ истиқболда – салбий таъсир кўрсатади".

"Террор ва қўрқувга асосланган ҳар қандай тузум узоқ яшамаганига тарих гувоҳ", -дея хулоса қилган вазир. 

14 февраль куни Малайзия ҳуқуқ-тартибот идоралари КХДР етакчиси Ким Чен Иннинг ўгай акаси Ким Чен Намнинг ўлимини тасдиқлади. У Куала-Лумпур аэропортида ўзини ёмон ҳис қилгач, шифохонага етмасдан ҳалок бўлган эди. 

Ҳозирча, жиноят қандай содир этилгани, марҳум нима сабабли ҳаётдан кўз юмгани номаълум. Шу билан бирга, Ким Чен Намнинг ўлимига доир расмий хулоса ҳам эълон қилинганича йўқ. Ҳозирча, ҳуқуқ идоралари ходимлари 4 киши, шу жумлада кузатув камераларига тушиб қолган икки қизни ҳам қўлга олган.