Россиялик сапёрлар Суриянинг Ҳалаб шаҳрини минасизлаштириш бўйича ишларни якунлашди ва энди Россияга қайтмоқдалар. Бу ҳақда Россиянинг Биринчи каналида кўрсатилган репортажда сўзланган.

Таъкидланишича, ҳарбийлар тантанали равишда ўз юртларига кузатилдилар. Хайрлашув маросимига шаҳарда яшовчи кўплаб тинч аҳоли келди.

Ҳалабнинг минасизлаштирилишида махсус ўргатилган итлар ҳам иштирок этган. 

"У ҳали ёш, бу унинг биринчи хизмат сафаридир, у бу сафарда кўп тажриба орттирди, бироқ яна кўп нарса устида ишлаш керак. Бошида биз Россиядаги совуқлардан бундай иссиқ ўлкага келганимизда унга айниқса қийин бўлди, у бундай шароитга узоқ вақт давомида мослашишига тўғри келди", деб айтмоқда сапёрлардан бири ўзининг ити ҳақида.

Ҳалабни минасизлаштириш бўйича кейинги ишларни суриялик сапёрлар давом эттиришади. Репортажда айтилишича, россиялик сапёрлар уларни барча зарурий кўникмаларга ўргатиб, уларга энг янги қурилмаларни қолдиришган.

Январь охирида россиялик ҳарбийлар Ҳалабдаги 2 минг гектардан кўпроқ майдонни минасизлаштирганлари маълум қилинганди.