Туркия Қуролли кучларининг Раққа шаҳрида ўтказадиган эҳтимолий аксилтеррор амалиётига ёндашуви Ал Боб шаҳридаги каби бўлади. Бу ҳақда Туркия бош вазири Бинали Йилдирим Мюнхен хавфсизлик коференцияси доирасида журналистлар билан ўтказган мулоқотида баёнот берди.

«Сурия шимолида Туркия армияси қисмлари бор. Улар Сурия озодлик армияси бўлинмаларига кўмак бермоқда. Айни усул Раққадаги ИШИДга қарши ҳам қўлланилиши мумкин», - деб қайд этган бош вазир. 

Унинг сўзларига кўра, Туркия Ал Бобни ИШИД жангариларидан тўлиқ озод қилганидан кейин ҳам «Фрот қалқони» амалиётини давом эттириш ниятида. 

«Бунинг учун бирор террорчи гуруҳга нисбатан бошқа террорчи гуруҳ билан ҳамкорлик қилишга чек қўйиш талаб этилади. Ўйлаймизки, Вашингтон Анқаранинг бу қарашини таҳлил қилиб чиқади», - деган Туркия бош вазири. 

Йилдиримнинг айтишича, Туркия нафақат ИШИД, балки Курдистон ишчи партияси ва ушбу ташкилотнинг Суриядаги шохобчалари бўлган PYD ва YPG тузилмалари билан ҳам курашни давом эттиради. 

Туркия ҳукумати раҳбарининг уқдиришича, террорчилик ташкилотига қарши курашиш мақсадида бошқа бир террорчилик ташкилотини жалб қилишни ёқлаб бўлмайди ва Анқаранинг бу ёндашуви Вашингтон расмийларига етказилган. 

Бош вазирнинг таъкидлашича, АҚШнинг Суриядаги ҳаракатлари НАТО доирасидаги ҳамкорлик руҳига жавоб беради. «Ўйлайманки, Вашингтон маъмурияти Туркия кайфиятини эътиборга олади», - деган Бинали Йилдирим.