13 февраль куни Куала-Лумпурда ҳаётдан кўз юмган Шимолий Корея етакчиси Ким Чен Иннинг акаси Ким Чен Намнинг ўғли отаси жасадини олиб кетиш учун бу шаҳарга етиб келди. Бу ҳақда Япониянинг NHK телеканали маҳаллий манбаларга асосан хабар бермоқда.

Баъзи маълумотларга кўра, Ким Хан Соль Малайзия пойтахтига сешанба куни эрталаб етиб келган ва отасининг жасади сақланаётган касалхонага борган. NHK’нинг хабар беришича, бу вақт давомида касалхонани қўриқлаш хизмати кучайтирилган, у ерга махсус топшириқли автоматик қуролга эга 30-40 жангчи ташланган. 

Телеканалнинг хабар беришича, Ким Хан Соль касалхонада сақланаётган марҳум отаси эканини тасдиқлаган. Шимолий Кореянинг Малайзиядаги элчихонаси унинг жасадини беришни талаб қилмоқда. Бироқ бу мамлакат ҳукумати марҳум жасади фақатгина унинг яқинларига берилишини маълум қилган. Икки мамлакат ўртасида келиб чиққан можаро туфайли Малайзиянинг Пхеньяндаги элчиси юртига чақириб олинди.

14 февраль куни Малайзия полицияси Ким Чен Намнинг ўлимини тасдиқлади. Унга Куала-Лумпур шаҳри аэропортида суиқасд қилишган ҳамда касалхонага кетиш чоғида ҳаётдан кўз юмган. Ҳуқуқни муҳофаза қилиш органи ходимларининг маълумотига кўра, у ер усти хизмати ходимларига кучли бош айланишидан шикоят қилиб мурожаат қилган, шунингдек, номаълум шахс унинг юзига қандайдир суюқликни сепиб юборганини айтган.

Бошқа тахминларга кўра, номаълум аёл унинг юзига қандайдир модда билан тўйинтирилган матони яқинлаштирган. Жанубий Корея ОАВлари заҳарланган игналар ёрдамида ҳужум қилингани ҳақида хабар беришганди. Бироқ бу тахминларнинг ҳеч бири расман тасдиқланмади.

Аввалроқ Ким Чен Намга ҳужум қилинишига ойдинлик киритувчи видеолавҳа интернет тармоғида пайдо бўлгани ҳақида хабар бергандик.

Маълумот учун, Ким Чен Нам – КХДР собиқ етакчиси Ким Чен Ирнинг катта ўғли бўлиб, онаси таниқли маҳаллий актриса Сон Хе Рим ҳисобланади. 2001 йилнинг майида у Японияга сохта паспорт ёрдамида чиқиб кетиб, ўша вақтдан бери хорижда истиқомат қилиб келган.