Эроннинг олий раҳнамоси оятуллоҳ Али Ҳаменеий Исроил фуқароларини дунё тарихининг "жирканч бобидаги сохта халқ" деб атади. Бу ҳақда Associated Press ахборот агентлиги хабар бермоқда

Ҳаменеий бу ҳақда Теҳронда Фаластинни қўллаб-қувватлашга қаратилган анжуманда айтиб ўтди. Бу анжуман 1990-йиллардан бери ҳар 4 йилда ўтказилиб келинади. Оятуллоҳнинг нутқи 33 дақиқа давом этган.

Унинг айтишича, Исроил дунёнинг турли бурчакларидаги яҳудийларни фаластинликлар ерини эгаллаш ва унинг "асл моҳиятини" ўзгартириш учун Яқин Шарқда тўплаш йўли билан яратилган.  

Ҳаменеийнинг айтишича, Исроилнинг яратилиши "Тангри марҳамати билан ёпиладиган тарихдаги энг жирканч боблардан бири" ҳисобланади.

Ҳаменеий анжуманга йиғилган барчани Исроилга қарши ҳужумлар ва терактлар уюштирувчи ХАМАС ва "Ҳизбуллоҳ" ҳарбий гуруҳларини қўллаб-қувватлашга чақирди. 

Анжуман ўтказиладиган жой Исроил ва Фаластиннинг Фаластин байроғи рангларидаги катта харитаси билан безалган бўлган.

Аввалроқ АҚШ ва Исроил ҳамкорлик, жумладан Эронни бостириб туриш масаласи бўйича ишчи гуруҳлар шакллантириши маълум қилинганди.