Қишлоқ жойларда аҳолининг кенг қатламларини замонавий ва шинам уй-жой билан таъминлаш даражасини тубдан ошириш мақсадида Ўзбекистон Республикаси Президентининг 2016 йил 21 октябрда «2017 — 2021 йилларда қишлоқ жойларда янгиланган намунавий лойиҳалар бўйича арзон уй-жойлар қуриш дастури  тўғрисида»  ПҚ-2639 сонли қарори қабул қилинган.

Иқтисодиёт вазирлиги 22 февраль куни «Ўзбекистон республикасининг қишлоқ жойлари ва шаҳарларида арзон ва қулай уй-жойларни қуриш истиқболлари» мавзусида матбуот анжумани ўтказди. Унда қатнашган журналистларга, жумладан «Кун» мухбирига дастурда белгиланган асосий йўналишлар ҳақида маълумот берилди. Хусусан, дастур асосида қанча уй қурилиши, янги уйларнинг нархи қанча бўлиши ҳақида айтилди.

Дастурда белгиланган асосий йўналишлар:

- яшаш учун ижтимоий-маиший шарт-шароитларни яхшилаш, қишлоқ аҳолисининг замонавий, сифатли, шинам, арзон уй-жойга бўлган эҳтиёжларини қондириш;
- қишлоқ жойларда уй-жойлар қуриш учун ажратилган тураржой массивларида муҳандислик-коммуникация инфратузилмасини ва транспорт тармоқларини биргаликда ривожлантириш;
- конструктив ва архитектура-режалаштириш ечимларини оптималлаштириш ҳисобига лойиҳа-қидирув ва қурилиш-монтаж ишлари, шунингдек, барпо этилаётган уйлар таннархини пасайтириш;
- энергияни тежайдиган материаллар ва асбоб-ускуналарнинг янги турларидан фойдаланишни кенгайтириш;
- жойларда қурилиш индустриясини ривожлантириш, пудрат ташкилотларининг қувватларини кўпайтириш, уларнинг моддий-техника базасини мустаҳкамлаш;
- уй-жой қурилиши учун ажратиладиган ер ресурсларидан оқилона фойдаланишни таъминлаш;
- қишлоқ жойларда якка тартибда уй-жой қурилиши учун имтиёзли кредитлар беришнинг фуқаролар учун янада қулай шартларини жорий этиш.

2017 йил Дастури бўйича қурилиши режалаштирилган уй-жойлар тўлови

Қарорга мувофиқ, Дастурда «Қишлоқ қурилиш банк» АТБ, Ташқи иқтисодий фаолият миллий банки, «Ипотека-банк» АТИБдан ташқари «Халқ банки» АТБ, «Асака банк» АТБ ва «Ўзсаноатқурилишбанк» АТБ ҳам иштирок этади.

Уй-жойларнинг янги намуналарини қуриш учун Дастурда иштирок этувчи тижорат банклари томонидан уй қурувчиларга 3 йиллик имтиёзли давр ва биринчи 5 йил мобайнида йиллик 7 фоиз миқдоридаги фоиз ставкаси билан ва кейинги даврда Ўзбекистон Республикаси Марказий банкининг қайта молиялаштириш ставкаси миқдорида 15 йил муддатга имтиёзли ипотека кредитлари берилади.