Тошкент шаҳрининг Муқимий ва Бунёдкор кўчалари кесишмасида йўл ўтказгич қурилиши муносабати билан ёпилган чорраҳанинг транспорт ҳаракати учун очилиши 2017 йил 1 мартга кўчирилди. Бу ҳақда “Тошшаҳартрансхизмат” компанияси хабар тарқатди.

Компания тирбандликни келтириб чиқармаслик мақсадида, ҳайдовчи ва йўловчилардан қурилиш вақтида бошқа кўчалардан фойдаланишни сўради.

“Юзага келтирилган ноқулайликлар учун узр сўраймиз”, дейилади хабарда.

Аввалроқ Муқимий ва Бунёдкор кўчалари чорраҳаси 11−23 февраль кунлари ҳудудда йўл ўтказгич қурилаётгани муносабати билан транспорт воситалари ҳаракатланиши учун ёпилиши ҳақида хабар берилган эди.

Умумий узунлиги 900, баландлиги 6, кенглиги 24 метр бўлган 6 полосали мазкур йўл ўтказгич нафақат ҳайдовчи ва пиёдаларга, балки шу ерда яшаётган аҳолига ҳам бир қанча қулайликлар яратади. Кўприкнинг икки томонида пиёдалар учун умумий узунлиги 131,6 метр бўлган иккита ер усти ўтиш йўлаги ҳам барпо этилмоқда.