Туркия президенти Ражаб Тоййиб Эрдўған март ойида Россияга уюштирадиган ташрифида ўзаро муносабатлар нормаллашишининг бориши, амалда қолаётган савдо санкцияларининг бекор қилиниши, Сурия ва аксилтеррорчилик масалаларини муҳокама қилади. Бу ҳақда Эрдўғаннинг расмий вакили Иброҳим Калин маълум қилди.   

"Март ойида олий даражадаги ҳамкорлик йиғилиши ўтказилиши муносабати билан Россияга ташриф режалаштирилмоқда. Ҳозир самолёт билан боғлиқ воқеадан кейин киритилган санкцияларни бекор қилиш бўйича иш олиб борилмоқда. Ташриф вақтида бу ишга нуқта қўйилади, деб умид қиламиз.  Шунингдек, кун тартибида Сурия, аксилтеррорчилик, Ироқ бор", деб айтди Калин.