Хитойнинг Гуанси-Чжуан мухтор тумани ер захиралари бошқармаси интизом назорати гуруҳи бошлиғи Ло Вэйго 15 млн юан (2,18 млн доллар) пора олгани учун 15 йилга озодликдан маҳрум этилди, деб хабар бермоқда Sina портали.

"Фачжи ваньбао" газетаси маълумотларига кўра, собиқ амалдор ўз хизмат мавқеини 2005 йилдан 2011 йилгача суистеъмол қилиб келган. Суд қарорига кўра, унинг 2 млн юанлик мол-мулки мусодара қилинади ҳамда унинг ўзи 100 минг юан жарима тўлайди. 

Хитойда Си Цзиньпин 2012 йил ноябрда ҳокимият тепасига келгандан бери коррупцияга қарши катта кўламли кампания олиб борилмоқда.