Ҳиндистоннинг Жамму ва Кашмир штатларида апрель ойидан дабдабали тўй маросимлари ўтказиш тақиқланди: келиннинг ота-оналари тўйга 500 нафардан ортиқ, куёв томон эса 400 нафардан ортиқ меҳмон чақира олмайди.

Бундан ташқари, тўй зиёфатида 7тадан ортиқ таом тарқатиш мумкин бўлмайди, бу орқали озиқ-овқатнинг исроф бўлиши олди олинади.

Ҳудудий парламент аъзоларидан бири бундай тақиқни бутун Ҳиндистон бўйлаб жорий этишни таклиф этган.

Бу қарор шовқин-суронли тўй маросимларидан норози кишилардан келган кўплаб шикоятлардан кейин қабул қилинди.

Шунга ўхшаш тақиқ 1984 йилда ҳам маҳаллий ҳукумат томонидан қўлланган, аммо аҳолининг кескин норозилиги туфайли кейинчалик бекор қилинганди.

2016 йилнинг ноябрида Ҳиндистонда бизнесмен ва Карнатак штати собиқ вазири Жанардхана Реддининг қизининг 5 кунлик тўй маросими ўтказилганди. Тўй харажатлари 74 миллион долларни ташкил этди. Шундан сўнг мамлакат бўйлаб миллиондан ортиқ киши иштирокида намойишлар тўлқини кўтарилди.

Митинг бошланишидан бир неча кун олдин ҳукумат дабдабали тўйларни тақиқлаш бўйича қонун лойиҳасини ишлаб чиқди. Бундан ташқари, меҳмонлар ва дастурхонга тортиладиган таомлар сонини чеклаш, тўй харажатлари миқдорини 7500 доллардан оширганлик учун 10 фоизлик солиққа тортиш бўйича таклиф киритилди.