Малайзия ҳуқуқни ҳимоя қилиш органлари КХДР ҳукуматидан Ким Чен Намнинг ўлимига алоқадорликда гумон қилинаётган 4 кишини топширишни талаб қилмоқда. Бу ҳақда Bernama агентлиги Twitter микроблогида хабар қилган.
 
Таъкидланишича, Шимолий Корея етакчиси Ким Чен Иннинг ўгай акасини ўлдиришда гумон қилинаётган 4 киши Малайзияни тарк этиб Пхеньянга етиб келган. 

Аввалроқ, Малайзия ҳукумати Куала-Лумпур шаҳри аэропортида ўлдирилган Ким Чен Намнинг жасадини топшириш шартини билдирган эди. Бунинг учун Пхеньян марҳумнинг яқинларига тегишли ДНК намуналарини Малайзия расмийларига тақдим этиши керак. Ўз навбатида КХДРнинг Малайзиядаги элчисининг таъкидлашича, расмий Пхеньян Ким Чен Нам жасадида ўтказилган экспертиза натижаларини тан олмайди ва Куала-Лумпурни зудлик билан марҳумни Шимолий Корея томонига қайтаришни талаб қилган эди.