«Барселона» ҳужумчиси Неймарнинг вакили футболчи устидан суд жараёни ҳақида гапирди.

Неймар 2013 йили «Сантос»дан «Барселона»га трансфери қилиниши вақтида амалга оширилган молиявий фирибгарлик бўйича очилган иш яна шу ҳафтада давом эттириладиган бўлди. Суд футболчининг апелляциясини рад этди, эндиликда йил охирига қадар якуний ҳукм чиқарилиши керак.

Неймарнинг манфаатларини ифода қилувчи, унинг фаолияти билан шуғулланувчи NN Consultoria компаниясининг ишонч билдиришича футболчи қонунни бузмаган ва уни қамашмайди. Бу ишда айбдор айбловчи томон - DIS инвестиция жамғармасининг ўзидир. Шу компания шикояти туфайли суд футболчига қарши иш очган.

«Биз ишонамизки, жараён якунида Неймар айбсиз деб топилади. Нафақат бизнинг мижозимиз, балки, исталган профессионал спортчи ўзига иш жойини ўзи танлашга ҳақли, қандай таклиф бўлиши иккинчи масала. Бошқа сўз билан айтганда, ҳозир қулдорлик даври эмас. Бундан бошқача фикрлаш эса демократик давлатдаги инсон ҳуқуқларини поймол қилиш ҳисобланади. Бахтимизга Неймарни қамашмайди. Лекин кўриниб турибдики, бизнинг хурсандчилигимизни DIS компаниясидагилар кўра олишмаяпти», - дея NN Consultoria вакили сўзларини келтирган GloboEsporte.

Неймарнинг ўзи судда ҳамиша фақат футбол билан банд бўлгани, шартномалар билан шуғулланмаганини айтган. Лекин уни коррупция учун жиноий жавобгарликка тортишни истамоқда. DIS ушбу футболчини 5 йилга қамашни сўраган. Прокурор эса унга 2 йиллик қамоқ ва 10 миллион евро миқдорида жарима тайинлашни сўраган.

Испанияда ҳамма ҳам Неймарни айбдор деб билиб, уни жазолаш керак деб ҳисобламайди. Масалан адвокат Пау Молинс бу борадаги фикрларини билдирган, унинг сўзлари La Vanguardia нашрининг охирги сонида чоп этилган.

«Прокурорнинг фикрича, футболчининг қайси клубда ўйнашни танлаши бўйича қарори шартнома мажбуриятларини бузиш ва бунинг учун қамоқ жазосини белгилаш керак. Аммо Неймар ҳеч қачон DIS компаниясининг бошқарувчиси ёки ходими бўлмаган. Шу ҳолатдагина коррупция ҳақидаги қонун асосида шундай жазо тайинлаш мумкин эди», - деган адвокат.

DIS томони футболчини жазолашдан ташқари, зарарларни қоплаш учун 159 миллиондан 195 миллион еврогача бўлган миқдорда товон ундиришни истайди. Шунингдек, жамғарма «Барселона» раҳбариятини ҳам айблаган. 

Неймар - муттаҳамми? «Барселона» юлдузини суд кутмоқда