Toshkent shahrida 8ta kichik sanoat hududlarini tashkil etish rejalashtirilmoqda. Toshkent shahri hokimiyati O‘zbekiston Respublikasi Prezidentining «Toshkent shahrida kichik sanoat zonalarini tashkil etish to‘g‘risida»gi qarori loyihasini tayyorlagan.
Hujjat loyihasiga ko‘ra, kichik sanoat zonalari poytaxtning 8 tumani: Mirzo-Ulug‘bek, Yashnobod, Olmazor, Mirobod, Chilonzor, Yunusobod, Bektemir va Uchtepa tumanlarida tashkil etiladi.
Mazkur hududlardagi ishlab chiqarish maydonlari va yer uchastkalari tadbirkorlik sub'yektlariga 10 yillik uzoq muddatli ijaraga beriladi. Barqaror o‘sish sur'ati, loyihani hayotga tatbiq etish bo‘yicha shartlar ta'minlansa, soliq va to‘lovlar o‘z vaqtida to‘lab borilsa ijara muddati o‘z-o‘zidan uzaytiriladi.
Shu bilan birga, kichik sanoat zonalari ishtirokchilari ijara to‘lovlari borasida imtiyozlarga ega bo‘ladi.
Hujjatda qayd etilishicha, tijorat banklari mazkur zonalarda loyihalarni amalga oshirayotgan kompaniyalarga kamida 7 yil muddatga imtiyozli kreditlarni 24 oylik Markaziy bank qayta moliyalash stavkasidan ko‘p bo‘lmagan imtiyozli foiz stavkalari asosida taqdim etadi.
