Ҳаракатлар стратегиясида суд-ҳуқуқ ислоҳотларини бугунги кун талаби даражасида чуқурлаштириш билан боғлиқ вазифаларга алоҳида эътибор қаратилган. Унга кўра, қарорлар қабул қилишда судлар мустақиллигини таъминлайдиган кенгаш тузиш ҳамда профессионал судьялар корпусини шакллантириш, судьялар ҳуқуқи ва қонуний манфаатларини ҳимоялашга доир чора-тадбирларнинг амалга оширилиши белгилаб қўйилган. 

Ушбу йўналишда маъмурий судлар, хўжалик судлари тизимида минтақавий аппеляция судларини тузиш, судья ёрдамчиси лавозимини таъсис этиш орқали келгусида судларни ихтисослаштириш ҳамда уларнинг девонини мустаҳкамлаш чоралари ҳам кўрилиши алоҳида вазифа сифатида қўйилган. 

Шунингдек процессуал қонун ҳужжатларини такомиллаштириш, қуйи инстанция судларининг камчиликларини мустақил бартараф этиш ва узил-кесил қарор қабул қилиш юзасидан юқори суд инстанцияларининг ваколатларини кенгайтириш масалаларига алоҳида эътибор қаратилгани қайд этилди. Таъкидланишича, бу айрим ҳолларда учрайдиган сансоларликларга ҳамда ишларнинг кўриб чиқилиши судлар томонидан асоссиз чўзиб юборилишига барҳам беради. 

Ҳуқуқбузарликларнинг олдини олиш, жиноятчиликка қарши курашиш ва жамоат тартибини сақлаш бўйича ички ишлар органларининг фаолиятини тубдан такомиллаштиришга ҳам алоҳида эътибор қаратилган. Шу аснода 2018-2021 йилларда жиноят ҳамда жиноят-процессуал қонун ҳужжатларини янада такомиллаштириш концепцияси ишлаб чиқилиши кўзда тутилган.