Хитойда парранда гриппи (H7N9) билан касалланганлар сони йил бошидан 270 кишини ташкил қилди. "Синьхуа" ахборот агентлигининг маълум қилишича, улардан 87 таси ўлим билан якунланган.  

"Инфекция авж олгани ҳақидаги маълумот саросимадан қочиш ва паррандаларни ташиш ва сотиш бўйича кузатувни кучайтириш учун кенг тарқатилиши лозим", деб айтилди Хитой давлат кенгаши йиғилиши якунларига кўра тасдиқланган баёнотда. 

Жорий йил бошидан Хитойда одамнинг парранда гриппи билан касаллангани ҳолатлари Ляонин, Цзянсу, Чжэцзян, Шаньдун, Хэнань, Гуандун, Гуйчжоу, Хубэй, Хунань ва Сичуань вилоятлари ва Пекинда аниқланган.

Биринчи марта инсонда парранда гриппи ташхиси 2013 йил мартда қўйилган. Ҳанузгача бу касаллик инсондан инсонга ҳаво-томчи йўли билан ўтишига далил йўқ. Хитойда бу касалликнинг 2013-2014 йилларда авж олиши 36 кишининг умрига зомин бўлганди.