УЕФА собиқ президенти Мишель Платини дисквалификациясидан сўнг илк бора футбол учрашувига борди, деб хабар бермоқда AP.

Агентлик маълумотига кўра, 61 ёшли франциялик «Жеффруа-Гишар» стадионига бориб, Европа лигасининг 1/16 финали доирасидаги «Сент-Этьен»-«Манчестер Юнайтед» ўйинини томоша қилган. Баҳсда францияликлар 0:1 ҳисобида имкониятни бой беришди ҳамда мусобақани иштирокини якунлашди («Сент-Этьен» биринчи ўйинда 0:3 ҳисобида мағлуб бўлганди). Платини бу клуб сафини 1979-1982 йилларда ҳимоя қилган.

Мишель коррупцияда айбланиб, футболдаги барча фаолиятдан четлатилгач, футбол ўйинларига бормаганди. Бу ҳолат 2011 йилда ФИФА маблағларидан 2 миллион доллар миқдоридаги пул ўтказмаси билан боғлиқ можародан сўнг юз берган.

Аввалига унинг четлатилиш муддати саккиз йилга тенг эди, бироқ кейинчалик суд жараёнида муддат икки бараварга қадар қисқартирилди. Платинидан коррупция билан боғлиқ айбловлар олиб ташланди, бироқ у ФИФАнинг ўзини тутиш кодексидаги бошқа қоидабузарликларда айбдор деб топилди, улар орасида совғалар қабул қилиб олиш ҳамда манфаатлар тўқнашуви кабилар бор. Франциялик ҳеч қандай тақиқлов йўқлигига қарамай Евро-2016даги биронта ўйинга келмади, мусобақа эса унинг юртида ташкиллаштирилганди.