Филиппинда президент Родриго Дутертени танқид қилиши билан танилган мухолиф сенатор Лайло де Лима ҳибсга олинди. Бу ҳақда 24 февралда Reuters ахборот агентлиги хабар бермоқда.  

Маҳаллий суд сенатордан ташқари, унинг собиқ ҳайдовчиси ва тансоқчисини ҳам ҳибсга олди. "Ҳақиқат ошкор бўлади, мен адолат бўлишига эришаман. Мен айбсизман", деб айтди ОАВ вакилларига сенатор полиция уни идорасидан олиб чиқиб кетаётганда.

Ўтган ҳафтада Филиппин адлия вазирлиги де Лимага гиёҳвандфурушлардан пора олиш айбловини қўйганди.

21 февралда сенатор мамлакат ҳукуматини Дутертега импичмент эълон қилишга чақирганди. 2016 йилда эса у Дутертега нисбатан тергов ўтказиш талаби билан Халқаро жиноий судга мурожаат қилганди. Сенатор Дутерте томонидан гиёҳвандларга қарши қўлланувчи усулларни "инсонийликка қарши жиноятлар" деб атаганди.