Россия пойтахти Москва шаҳри метрополитенининг ўнлаб қурувчилари иш ташлаш ўтказишди. Улар ойлик маошлари тўланмаганидан ғазабда бўлганлар. Маълумотларга кўра, ишчилар беш ойдан бери иш ҳақларини олишмаган.

Хабарларга кўра, «Ингеоком» қурилиш-монтаж бошқармасининг юзлаб норози ишчилари – улар асосан Тожикистон ва Ўзбекистондан бўлган муҳожирлардир – бошқарма офиси ёнида йиғилиб, ишлаб топган пулларини беришларини талаб қилишган.

Ходимлар олдига чиққан иш берувчи уларнинг барчаси хорижий фуқаролар экани ҳамда иш ташлашга ҳақлари йўқлигини маълум қилган.

Россия оммавий ахборот воситаларининг таъкидлашича, бу ушбу компания билан боғлиқ биринчи иш ташлаш эмас. Аввалгиси бир йил аввал рўй берган. Ишчилар бепул ишлашда давом этишдан бош тортишгандан сўнг, уларнинг карточкаларига беш ойлик маошлари қайтарила бошланган.

2016 йилнинг декабрида эса ҚМБ-77 ишчилари бир ярим ой давомида иш ташлаш ўтказишган ҳамда улар турли ташкилотлар, ҳокимлик, прокуратура, Меҳнат инспекциясига боришган. 14 февралда эса уларга иш ҳақлари тўлаб берилган.