Google эгаси ҳисобланувчи Alphabet Inc. компанияси ҳайдовчисиз автомобилларда ишлатиладиган лидар – лазер локатор технологиясини ўғирлаш айблови билан Uber такси хизмати устидан судга даъво аризаси берди. 

Маълум қилинишича,  Alphabet Inc. ҳайдовчисиз автомобиллар учун технологиялар яратишга ихтисослашган Waymo компаниясини яратган. Бу компания Uber ва Google’нинг собиқ муҳандисларини лидар тизимини ўғирлашда айбламоқда.

"Фикримизча, бу хатти-ҳаракатлар Waymo’нинг тижорий сирлари ва интеллектуал мулкини қўлга киритиш учун аниқ режа бўлган", деб айтилди Google’да.

Тахмин қилинишича, Google’нинг собиқ ходими Энтони Левандовски компанияни тарк этишдан аввал Waymo ишланмалари, жумладан лидар схемаларига эга 14 мингта махфий файлни ўғирлаган ва сўнгра улардан Uber’да очган ўзининг шахсий стартапида фойдаланишни бошлаган.