АҚШнинг бир қанча шаҳарларида халқаро Шиллер институтининг махсус акцияси ўтказилди. У Украинадаги “Майдон” воқеаларига бағишланди. Акция иштирокчилари махсус варақалар тарқатишган, уларда бу мамлакатда ҳокимиятнинг ўзгариши АҚШнинг 44-президенти Барак Обама ва миллиардер Жорж Сороснинг бевосита қўллаб-қувватлаши билан рўй бергани айтилади. Бу ҳақда ТАСС хабар бермоқда.

Агентлик мухбирининг таъкидлашича, Нью-Йоркдаги митинг қатнашчилари БМТ бош қароргоҳига яқин ерда йиғилишган. Уларнинг қўлида “Обамани қамоққа” ҳамда “Сизнинг душманингиз – Жорж Сорос” каби ёзувлар бўлган. Шиллер институти расмий вакили Дайан Сэрнинг сўзларига кўра, шунга ўхшаш акциялар АҚШнинг яна икки шаҳри – Бостон ва Ҳьюстонда, шунингдек Берлинда (Германия) ҳам бўлиб ўтган.

Сэрнинг маълум қилишича, АҚШ аҳолиси Украинадаги ҳодисалар ҳақида ҳақиқатни билишлари жуда муҳим, сабаби айнан ўша инсонлар АҚШ янги президенти Дональд Трампни шундай услублар билан ҳокимиятдан четлатишмоқчи. 

Маълумот учун, “Майдон” (Евромайдон) – 2013-2014 йилларнинг қишида  Украина пойтахти Киев ва бошқа қатор шаҳарларида ўтказилган норозилик акцияларидир. У мамлакатда ҳокимият ўзгариши, ағдарилган президент Виктор Янукович эса давлатни тарк этишига олиб келди. Майдон етакчилари ҳукуматда лавозимларни эгаллаб, парламент депутатларига айланишди. Ўша ҳодисалар вақтида 100дан ортиқ инсон ҳалок бўлган.