Tesla автомобилсозлик компанияси 22 февралда 2016 йилнинг 4-чогари учун молиявий ҳисоботни тақдим қилди. Ҳисоботга кўра, компания 121,3 млн доллар зиён кўрган. Бундан ташқари, Tesla 2017 йил сентябрда янги модели Model 3’нинг серияли ишлаб чиқарилишини маълум қилди, деб хабар бермоқда Los Angeles Times нашри.

2016 йил 3-чоракда Tesla ўз тарихида биринчи маротаба даромад олганини намойиш қилган, бироқ у шундай натижага 4-чоракда эришишга муваффақ бўлмади – тушум 2,28 млрд долларни, зиён эса 121,3 млн долларни (бир акцияга 69 цент зиён) ташкил қилди. Бир йил аввал шу кўрсаткичлар мос равишда 1,24 млрд доллар ва 320 млн доллар бўлган.  

Tesla компанияси Model 3 ҳамёнбоп автомобилидан йил охиригача ҳафтасига 5 мингтадан, 2018 йилдан эса 10 мингтадан чиқаришни мўлжалламоқда. Автомобилнинг нархи 35 минг доллардан бошланади ва у бир қувватланишда 346 км йўл боса олади. Компания ишлаб чиқариш ҳажмини ошириш учун яна учта Gigafactory заводини қурмоқчи.

Компаниянинг моделлар қатори ҳозирда иккита автомобиль – Model S седани ва Model X кроссоверидан иборат. Компания жорий йилнинг биринчи ярмида икки моделдан умумий ҳисобда 47-50 мингта сотишни режалаштирмоқда.