Жорий йилнинг 18 февраль куни тунги соат иккилар атрофида Хоразм вилояти Хива тумани ЙҲХБ инспекторлари томонидан фуқаро Бобожонов бошқариб кетаётган автоулов тўхтатилади. Ҳеч қандай ҳужжатларсиз машина бошқарувига ўтирган Бобожонов устига устак қаттиқ маст ҳам бўлган. Бу ҳақда Kun.uz’нинг Хоразм вилояти ҳокимиятидаги манбаси хабар бермоқда.

Натижада Бобожоновга тегишли бўлган автоулов белгиланган қонунга мувофиқ тегишли равишда расмийлаштирилиб, жарима майдонига олиб бориб қўйилади. Шу куни тонгда, аниқроғи, соат тўққизлар атрофида Бобожонов туман ички ишлар бош бошқармаси биноси ёнига бориб, устига бензин сепади ва ўзига ўт қўяди. Суд экспертизасининг баёнотига кўра, у бу ишни ҳам мастликда амалга оширган.

Хива тумани ҳокимлигидаги манбанинг маълумот беришича, мазкур вазият юзасидан Ўзбекистон Республикаси Жиноят Кодексининг 103-моддаси – “Ўзини ўзи ўлдириш даражасига етказиш” бўйича жиноят иши очилган. Сўнгги маълумотларга кўра, Бобожоновнинг саломатлиги айни дамда оғирлигича қолмоқда.

Ичкилик – инсоннинг душмани эканлиги, бир кунмас бир кун уни шарманда қилиши, керак бўлса, ўлим ёқасига олиб келиши борасида неча замонлардан бери айтиб келинади. Телевидения, радио, матбуот ва интернет орқали жонли мисоллар воситасида мисоллар келтирилади. Аммо нафс йўлида юрадиган, иродаси заиф ёки ичкилик ичмаса, гўёки эркак бўлмай қолишидан чўчиган олифта кимсалар алалоқибат мана шундай фожиага дуч келишади. Ўзи-ку майли, аммо оила, қариндош-уруғ ва ёру-дўстларининг ҳам юзини ерга қаратишади.