Ўзбекистонда ички ва хорижий сайёҳликни ривожлантириш мақсадида кенг қамровли амалий чораларни кўриш режалаштирилмоқда. Хусусан, Бухорода 42 йўналишдаги ҳунармандлик мактабидан иборат «Бухорода миллий ҳунармандлар маркази» ҳамда гиламдўзлик музейи ташкил этиш режалаштирилган. 

Бу билан Ўзбекистонга ташриф буюраётган сайёҳларни миллий ҳунармандчилик ва гиламдўзлик анъаналари билан таништириш, гиламларни тўқишнинг қадимги усулларидан хабардор қилиш ҳамда хоҳловчиларга ушбу жараёнда ўзлари иштирок этишларига имконият тақдим этиш белгиланган. 

Ўзбекистоннинг Фарғона вилояти Риштон туманида кулолчилик маркази ташкил этилади. Мазкур чора сайёҳларга Ўзбекистон миллий кулолчилик санъати, олий сифатли маҳсулотларни тайёрлашнинг қадимги усулларидан маълумот бериш, истаган кишиларга шахсан иштирок этиш имконини беради. 

Бундан ташқари, Фарғонанинг Марғилон шаҳрида Хонатлас маркази ташкил этиш режалаштирилмоқда. Бу ҳам сайёҳларни ўзбекларнинг анъанавий ипак матоси бўлган хонатласни хорижлик сайёҳларга таништириш ҳамда уни ЮНЕСКОнинг номоддий маданий меросига киритиш учун шароит яратади. 

Шу билан бирга, Наманган вилоятининг Чуст туманида темирчилик музейи барпо этилади. Маълумки, чуст пичоқлари ўзларига хос шакли ва сифати билан машҳурдир. Сайёҳларни ушбу пичоқларнинг тайёрланиш жараёни билан таништириш мақсадида музей ҳузурида темирчилик цехларини ташкил этиш кўзда тутилмоқда. Унда сайёҳлар шахсан иштирок этишлари мумкин бўлади. 

Ушбу марказ ва музейларнинг 2018 йил март-июнь ойларида амалга оширилади. Норматив-ҳуқуқий ҳужжатлар муҳокамаси сайтига жойлаштирилган «Ўзбекистон Республикасида ўрта истиқболда туризмни ривожлантириш бўйича Концепциясини ҳаётга татбиқ этиш чоралари тўғрисида»ги қарори лойиҳасида сўз юритилган.