Самарқанд вилояти матбуот уйида ташкил этилган йиғилишда коммунал соҳада учраётган муаммолар соҳа раҳбарлари иштирокида муҳокама этилди. Унда вилоят ҳокими ўринбосари О.Очилов кун тартибидаги масала юзасидан маълумот берди. Бу ҳақда вилоят ҳокимлиги матбуот хизмати хабар бермоқда. 

Учрашувда таъкидланишича, бугунги кунда аҳолидан тушаётган энг кўп мурожаатлар айнан коммунал хизматларга тегишли. Шу билан бирга, дебитор қарздорлик ҳам энг катта муаммолардан бири бўлиб турибди. Мисол учун, биргина электр энергиясидан 2017 йил биринчи январь ҳолатига 660 миллиард сўм дебитор қарздорлик мавжуд. Табиий газдан эса бу қарздорлик 601 миллиард сўмни ташкил этади. Январь ойида 8,1 миллиард сўмлик табиий газнинг пули тўланмаган. Буларнинг бари хизмат сифатига йил сайин ёмон таъсир ўтказмоқда.

Шунингдек, «Марказгазтаъминот» унитар корхонаси директори Шукрулло Маҳмудов ҳамда «Самарқанд ҳудудий электр тармоқлари корхонаси» акциядорлик жамияти раиси Fулом Примовлар соҳадаги бугунги ҳолат ва амалга оширилаётган ишлар ҳақида маълумот берди.

– Ҳар куни эллик нафардан зиёд истеъмолчи асоссиз қарздорлик бўйича бизга мурожаат қилади, – дейди «Марказгазтаъминот» унитар корхонаси директори Шукрулло Маҳмудов. – Кўпинча бундай қарздорлик ҳисоблагичлардан нотўғри фойдаланиш, истеъмол қилинган табиий газ пулини назоратчиларга топшириш орқали юзага келмоқда. Асоссиз тарзда қарздор бўлиб қолаётган истеъмолчилар ҳам бор. Айтиш лозимки, назоратчининг табиий газ пулини истеъмолчидан талаб қилиши қонунга зиддир. Агар қарздорлик мавжуд бўлса, назоратчи огоҳлантириши мумкин.

Йиғилишда айтилганидек, бугунги кунда мамлакатимизда табиий газ сарфини ҳисоблаш ускуналари ишлаб чиқаришга мослашган иккита завод қурилиши давом этмоқда. Йил охиридан бошлаб янги турдаги электрон ҳисоблагичларни газтаъминот идоралари ҳисобидан хонадонларга ўрнатиш бошланади.