Демократлар партияси вакиллари 28 февраль куни АҚШ президенти Дональд Трампнинг Конгресс Сенати ва Вакиллар палатаси қаршисидаги нутқини тинглашга рўйхатдан ўтмаган муҳожирларнинг фарзандларини, шунингдек, мексикаликлар ва мусулмон мамлакатларидан келганларни таклиф этади. Бу ҳақда Демократлар партиясининг парламентарияларига асосланган ҳолда Politico нашри хабар берган.

Нашрнинг ёзишича, одатга кўра, конгрессменлар президентнинг чиқишига ўзи билан қариндошлари ва яқин дўстларини таклиф этиши мумкин бўлади.

Бу сафар Трампнинг қасамёд қабул қилиш маросимини бойкот қилган демократлар унинг Конгрессдаги чиқишига мусулмон мамлакатлардан келган муҳожирларни, мексикаликларни ҳамда рўйхатдан ўтмаган қочқинларни олиб келишмоқчи.

Демократларнинг фикрича, бундан мақсад Трампга унинг муҳожирлик сиёсати бўйича фармонидан азият чеккан шахсларни юзма-юз қилишдир. Улар Оқ уй раҳбарининг ғашига тегмоқчи ва унинг миграция сиёсатига «инсоний қиёфа беришга» уриниб кўрмоқчи.

«Умид қиламанки, зал (Трамп нутқ сўзлайдиган Конгресс зали) бутун Американи ифода этади», — деди конгрессмен Жим Ленжевин.

Шунингдек, Трампнинг нутқида унинг инаугурация маросими ўтказилаётган вақтда атайлаб Вашингтонни тарк этган демократлар ҳам қатнашади.

Бундан олдинроқ, демократлар Трампни ағдариб ташлаш режасини тузишгани хабар қилинганди.