АҚШнинг Пенсильвания штатининг Филадельфия шаҳридаги яҳудийлар қабристонига безорилар ҳужум уюштиришган. Бу ердаги қабртошлар ағдарилган ёки зарарлангани аниқланган, деб хабар қилмоқда Associated Press агентлиги. 

Якшанба, 26 февралда қабристонга келган эркак полицияга қўнғироқ қилиб, шундай ачинарли ҳолатга дуч келгани ҳақида хабар қилган. 

"Биз атрофни кўздан кечирганимизда яна юзга яқин қабр тошларнинг ағдарилганига гувоҳ бўлдик", — дея маълум қилган полиция вакили. Айни вақтда, ABC6 телеканали 500та қабртошга зарар етказилгани ҳақида хабар қилган. Ҳуқуқ-тартибот идоралари ушбу жиноятни ваҳшийлик ҳолатлари деб ҳисобламоқда. 

Агентликнинг қайд этишича, бу сўнгги бир ҳафта мобайнида содир этилаётган иккинчи шу каби жиноятдир. Аввалроқ, безорилар Миссури штати қабристонидаги қабр тошларини бузиб ташлашган эди.