АҚШ президенти Дональд Трамп Fox News телеканалига берган интервьюсида ОАВга уни обрўсизлантиришни мақсад қилган маълумотлар сизиб чиқиши ортида собиқ президент Барак Обама ва унинг одамлари турганини маълум қилди.

«Ўйлашимча, президент [собиқ] Обама бу ишларнинг ортида турибди, сабаби унинг одамлари бунга аниқ алоқадор. Сизиб чиққан маълумотлардан баъзи бири эҳтимол, айнан шу гуруҳдан тарқатилмоқда», - деди Трамп.

Америка етакчисининг аниқлик киритишича, у “жуда жиддий сизиб чиқишлар” ҳақида гапирган ҳамда улар мамлакат миллий хавфсизлигига ўта салбий таъсир кўрсатмоқда. Шу бир бирга, Трамп гап айнан қайси сизиб чиққан маълумотлар ҳақида кетаётганига ойдинлик киритмади.

Шунингдек, унинг таъкидлашича, ҳеч ким ҳеч қачон АҚШ сиёсатининг саҳна ортида нималар рўй бераётганини аниқ билмайди.

Трампнинг фикрича, унинг сиёсий фаолиятига тегишли маълумотларнинг сизиб чиқиши, афтидан давом этади.

Аввалроқ Дональд Трамп твиттер’даги саҳифасида ФҚБ давлат маълумотларининг ОАВга сизиб чиқишини тўхтатиб қола олмаётгани туфайли дарғазаб бўлганди.