АПЛнинг 8та клуби янада кўпроқ маблағ ишлаб топиш мақсадида Sporting Group International компанияси билан шартнома имзолади. Бу ҳақда Mirror нашри хабар тарқатди.

Манбага кўра, компания клублар формасидаги чап қўл қисмидаги бўш жойга рекламалар жойлаштириш билан шуғулланади. Жамоалар бунинг эвазига йилига қўшимча 10 миллион фунт стерлинггача ишлаб топиши мумкин бўлади. Қўл қисмидаги реклама жойи титул ҳомийси тўлайдиган пулнинг 20 фоизини ташкил қилиши кутилмоқда. Мисол учун «Манчестер Юнайтед титул ҳомий сифатида Chevrolet‘дан йилига 47 млн. фунт олса, энди қўл қисмидаги реклама учун ушбу маблағнинг 20 фоизи, яъни салкам 10 млн. фунт қўшимча даромадга эга бўлади. Бир вақтнинг ўзида АПЛ логотипи футболканинг ўнг қўл қисмидаги жойини сақлаб қолаверади.

Ушбу масала бўйича келишув келгуси мавсумдан кучга кириши айтилмоқда. Ҳозирча 8та клуб бу бўйича шартномага имзо қўйган, бироқ яна 2 клуб титул ҳомий билан келишувга биноан кийимда бошқа логотипдан фойдаланиш ҳуқуқи йўқлиги учун бу шартномани имзолай олмайди.