БМТнинг Суриядаги мустақил комиссияси ҳисоботига кўра, 2016 йилнинг сентябрида Ҳалаб яқинида ташкилотнинг гуманитар ёрдамлар ортилган карвони Сурия ҲҲК томонидан бомбардимон қилинган.

Бундан ташқари, ҳисоботда зиддиятдаги икки томон ҳам Ҳалабда назоратни қўлга олиш учун ҳарбий жиноятлар содир этгани келтирилган.

Шунингдек, бу ҳужум «Сурия бўйлаб гуманитар карвонлар фаолиятини буткул тўхтатиб қўйгани» қайд этилган.

Ўтган йилнинг декабрь ойи охирида БМТ комиссияси 2016 йилнинг 19 сентябрь куни гуманитар карвонга қилинган ҳужум бўйича айбдорни аниқлай олмаётгани маълум қилинганли.

БМТ ўтган йил сентябрида Суриянинг икки ҳудудига, Ҳалаб ва Ҳомсга, 160 минг киши учун мўлжалланган юклар ортилган 51та юк машинаси йўллаганди. Аммо гуманитар карвон Ҳалабдан шимоли-ғарбда жойлашган Урум ал-Кубра тумани ҳудудида ҳужумга учради. Ушбу ҳужум натижасида, БМТ гуманитар миссиясининг 14 нафар ходими ҳалок бўлди. Бу ҳужумдан омон қолганлар ҳужум 3 босқичда амалга оширилгани ҳақида айтиб беришган. Уларнинг сўзларига кўра, аввалига вертолётлар омборларга бомба ташлаган. Кейин ҳарбий самолётлар бомбалаш ишлари ўтказилган. Охирида эса авиация пулемётлардан ердагиларни ўққа тутган.