Боливия президенти Эво Моралес томоғидаги муаммолар сабабли Кубага тиббий кўрикдан ўтгани йўл олди. Бу ҳақда Боливия президенти ҳузуридаги вазир Рене Мартинес маълум қилди. 

"Шифокорлар тавсиясига кўра бизнинг президент қардош Куба республикасида оддий тиббий кўрикдан ўтишига қарор қилинди", деб айтган Мартинес.

Мартинеснинг айтишича, Моралес томоғидаги муаммолардан анча вақтдан бери шикоят қилиб юрган ва унинг овози деярли йўқолиб қолган. Президент Кубага жўнашдан олдин Ла-Пас ва Кочабамбе шаҳарларида кўрикдан ўтган.

Ўтган йил Моралесда оёғидаги тугунларни тиклаш бўйича операция ўтказилганди.  У оёғини футбол ўйнаш вақтида жароҳатлаб олганди. Моралес 2011 йилда ҳам худди шундай жароҳатини операция қилдирганди.