Украинанинг Львов вилояти ҳудудидаги «Степная» шахтасида портлаш юз бериб, камида 11 кончи ҳалок бўлди. Бу ҳақда УНН хабар тарқатган.

«Степная» шахтасида аварияли ҳолат. Метан портлаган, қурбонлар сони 11 нафар», — деган Украина эркин касаба-уюшмалари конфедерацияси раҳбари Александр Волинец.

Айни вақтда кон ичида 172 кончи бор, шулардан 34 нафари авария рўй берган ҳудудда.

Портлаш оқибатида жароҳатланган 6 киши юқорига чиқариб олинган.

20 кишининг тақдири номаълумлигича қолмоқда.

Украина президенти Петро Порошенко ҳукуматга мамлакатдаги кўмир қазиб чиқарувчи барча корхоналарда текшириш ишларини ўтказишни буюрди ва Львов вилоятидаги шахтада юз берган портлаш туфайли мотам эълон қилди.

"Украина президенти Львов вилоятидаги портлаш туфайли мамлакатда миллий мотам кунини эълон қилди. Тегишли фармон бугуннинг ўзида имзоланган. Президент, шунингдек, мамлакат Вазирлар маҳкамасига Украинадаги кўмир қазиб чиқарувчи барча корхоналарда текширув ўтказишни буюрган", — деб ёзган Порошенконинг матбуот котиби Цеголко ўзининг фейсбукдаги саҳифасида.