Швеция ҳукумати ҳарбий хизматга чақирувни қисман тиклашга қарор қилди. Швецияда 2018 йилдан бошлаб умумий ҳарбий хизмат қайта жорий этилиши ҳақида Швеция Мудофаа вазирлиги расмийси Маринетт Радебога асосланиб, "Би-би-си" нашри хабар қилган

Швеция қуролли кучларига 2018 йилнинг 1 январидан 4 минг нафарга яқин йигит-қизлар чақирилади. 1999 йилда туғилган бу ёшлар 13 минг киши орасидан руҳий ва жисмоний тестлар орқали саралаб олинади. 

Швеция Мудофаа вазирлиги вакили ҳарбий чақириқнинг тикланиши  "атрофдаги ўзгаришлар, хусусан Россиянинг ҳарбий фаоллиги ошиши ва Болтиқ бўйида таранг вазият юзага келгани" билан боғлиқдир.

Ҳарбий хизматга чақириладиганлар 9-12 ой муддат хизмат қилади. Охирги икки юз йиллик ичида бирорта ҳам қуролли можаро юз бермаган Швецияда 2010 йили ҳарбий хизматга чақирув бекор қилинган эди. 2010 йилгача Швецияда ҳарбий хизмат фақат эркаклар учун мажбурий бўлган.

Швеция Финляндия каби НАТО таркибига кирмайди, лекин бу икки мамлакат ҳам альянс билан ҳамкорлик қилади. Скандинавиянинг яна икки давлати Норвегия ва Дания эса НАТО аъзолари ҳисобланади.