Франция президентлиги учун республикачилар партиясидан номзод бўлмиш Франсуа Фийоннинг матбуот котиби Тьерри Солер истеъфо берди. Бу ҳақда Politico хабар тарқатган.

Бундан олдинроқ, Фийон ўзига нисбатан расман тергов бошланганига қарамасдан сайловолди пойгасини тарк этмаслигини маълум қилганди.

Шу ҳафтада Фийоннинг хорижий масалалар бўйича маслаҳатчиси ҳам штабни тарк этганди.

Ўтган ой бошида Le Canard enchaîné нашрининг бир қатор мақолаларидан сўнг Фийоннинг сохта иш ўринлари яратиш йўли билан давлат маблағларини ўзлаштирганлиги эҳтимоли билан боғлиқ можаро юзага келганди.

Номзоднинг рафиқаси Пенелоп Фийонга нисбатан тергов ҳаракатлари у Франсуа Фийон парламент депутати ва сенатори бўлган вақтларда унинг ёрдамчиси сифатида ишлагани сабаб олиб борилмоқда. ОАВнинг аниқлашича, Фийоннинг хотини аслида ҳеч қандай иш қилмаган бўлса-да, мунтазам маош олиб турган.

Аввалроқ, Фийон ва унинг хотинига суднинг чақирув қоғозлари тақдим этилгани, улар март ойи ўрталарида суд мажлисида қатнашишлари лозимлиги маълум бўлган эди. Фийон бу терговни «сиёсий қотиллик» деб атади.

У терговчиларга барча ҳақиқатни маълум қилишга ваъда бериб, суриштирув ишлари унинг айбсиз эканини тасдиқлашига умид билдирди.

Фийон жамоатчилик ўртасида ўтказилган сўров натижасига кўра, сайлов пойгасида учинчи ўринда кетмоқда.

Сайловнинг биринчи тури 23 апрель куни ўтказилади. Сайловда яна икки асосий номзод бор: «Миллий фронт» партияси вакили Марин Ле Пен ва мустақил номзод Эммануэль Макрон.