Наманган вилоятининг Тўрақўрғон туманидаги аҳоли турар-жой уйида портлаш содир бўлди, уч киши касалхонага ётқизилди, деб хабар берди Ўзбекистон Ички ишлар вазирлиги матбуот хизмати.

“Наманган вилоятининг Тўрақўрғон туманида яшовчи 1992 йилда туғилган уй бекаси тунги пайтда электр чироғини ёққанида иситиш печига уланган шлангдан сизиб чиққан газ ва ҳаво аралашмасидан чақнаш содир бўлган”, - дейилади хабарда.

Натижада мазкур аёлнинг ўзи ва бирга яшовчи 2 ёшли қизалоғи ва 4 яшар ўғли куйиш жароҳатлари билан касалхонага ётқизилганлар. 

Мазкур ҳолат юзасидан суриштирув ишлари олиб борилмоқда. 

Қайд этиш керакки, Ўзбекистон ИИВ матбуот хизмати хабарида воқеа айнан қачон содир бўлганига ойдинлик киритилмаган.