Хитой ҳукумати Корея Республикасида Американинг THAAD ракеталарга қарши мудофаа тизимлари жойлаштирилишига қарши жавоб чораларини қўллай бошлади. Ёнхап агентлигининг Корея туристик ташкилотидаги манбасига кўра, Пекин маъмурияти Жанубий Кореяга бормоқчи бўлган сайёҳларга чекловлар жорий қилмоқда. 

"2 март куни Хитойнинг йирик сайёҳлик фирмалари Жанубий Кореяга саёҳатларни сотишга барҳам бериш бўйича мамлакат ҳукуматидан кўрсатма олган", - деб қайд этади агентлик. Маълумотларга кўра, "бу тақиқ Корея туризм соҳасига жиддий зарар етказиши мумкин".

Хитойликларнинг 40 фоизга яқини фирмалар орқали саёҳат тўпламларини харид қилади. 60 фоиз якка тартибдаги сайёҳларнинг деярли ярми авиачипталар харид қилиш каби масалаларда турфирмаларга мурожаат қилади. Янги чоралар Жанубий Кореяга келувчи сайёҳлар сонини 2 мартага қисқартириши мумкин. 

КТТ маълумотларига кўра, ўтган 2016 йилда Жанубий Кореяга 8,06 млн хитойлик ташриф буюрган, уларнинг ҳар бири ўртача 2,4 минг АҚШ доллари сарфлаган. Агар хитойлик сайёҳлар сони 2 баравар камайса, Корея 9,63 млрд доллардан маҳрум бўлиши эҳтимол.