Швециянинг Шеллефтео шаҳрида яшаган Жек Норхейм 2008 йилда йўқотган севимли мушугини 9 йил ўтиб топди.

Эрнст лақабли мушук Норхейм ўсмир бўлган пайтда сайрдан қайтиб келмаган. Йигит шу йиллар давомида мушугини бахтсиз ҳодиса оқибатида нобуд бўлган деб ўйлаб юрган, деб хабар бермоқда SVT.

Жек бу орада улғайиб, Норвегияга кўчиб ўтган ва оила қурган. Ўтган йили у яна она шаҳрига қайтиб келган. Бир ҳафта олдин эса унга маҳаллий приютдан қўнғироқ қилиб, у агар истаса мушугини олиб кетиши мумкинлигини айтишган. 

Бу хабардан эсанкираб қолган Жек приютга чипи бор бошпанасиз мушук тушиб қолгани ва чипда унинг эски эгаси ҳақида маълумот бўлганини аниқлаган. Маълум бўлишича, шу пайтгача мушук Шеллефтеодан унча узоқ бўлмаган қишлоқда кекса жуфтликнинг уйида яшаган. Жуфтлик вафот этгандан кейин эса мушук ҳайвонларни муҳофаза қилиш хизматига топширилган. 

Жек дастлаб мушуги топилганига ишонмаган, бироқ приютга келгач ҳақиқатан ҳам унинг қаршисида унинг ўсмирлигида йўқотган севимли мушуги турганига ишонч ҳосил қилган. Йигитнинг айтишича, мушук 9 йил аввал қандай бўлса, шундайлигича қолган.

Энди Эрнст ўзининг қадрдон эгаси билан яшамоқда. У аввалгидек картон қутилар билан ўйнашни яхши кўради, бироқ энди буни Жекнинг икки ёшли ўғилчаси билан биргаликда қилмоқда.