Украина президенти Пётр Порошенконинг хабар қилишича, Португалия парламенти ўтган асрнинг 32-33 йилларида бўлган очарчиликни украин халқининг геноцид қилиниши деб эътироф этган. 

"Бугун Португалия парламенти 1932-1933 йиллардаги очарчиликни украин халқининг қирғин қилиниши деб тан олди", — деб ёзган Порошенко Facebook саҳифасида.

Noticias ao minuto нашрининг ёзишича, Португалиянинг социал-демократик партияси шундай ташаббус билан чиққан. Хусусан, матнда айтилишича, социал-демократлар "ўтган асрнинг 30-йилларида Украинада бўлгани каби тоталитаризм ва инсониятга қарши жиноятларнинг барча турларини кескин қоралайди". Партия депутатлар гуруҳи вакили Телмо Коррейа (Telmo Correia)нинг таъкидлашича, "коммунизм қурбонлари сони нацизм қурбонлари сонидан ортиқ бўлган".

Айни чоғда, парламент муҳокамаларида иштирок этган Социалистик партия вакиллари  нацизм ва коммунизмни ўзаро бир-бири билан таққослаш нотўғри эканини таъкидлашган. 

Португалия коммунистик партияси аъзолари эса бунга қарши овоз берган. 

2016 йил декабрь ойида Украина парламенти бошқа давлатларга мурожаат қилиб, 1932-33 йиллардаги очарчиликни украин халқининг қирғин қилиниши сифатида тан олишни сўраган эди. 

1932-1933 йиллардаги очарчилик фақат Украинани эмас, СССРнинг буғдой етиштириладиган асосий ҳудудлари: Шимолий Кавказ, қуйи ва ўрта Волгабўйи, Марказий қоратупроқ минтақалари, Қозоғистон, ғарбий Сибирь, жанубий Урални қамраб олган. Ўшанда турли маълумотларга кўра, 7-8 млн киши ҳалок бўлган. Шулардан 3-3,5 миллион киши Украинада, 2 миллион нафар Қозоғистон ва Қирғизистонда, 2-2,5 миллион киши Россияда.