Бугун 2017 йил 4 март куни «Ўзбекистон» спорт мажмуасида катта бокс кечаси бўлиб ўтади. Унда The World Series Boxing (WSB) Бутунжаҳон Бокс Сериясининг VII фасл учинчи босқичида Ўзбекистоннинг “Uzbek Tigers” жамоаси Россия Федерациясининг "Patriot Boxing Team" жамоасига қарши рингга кўтарилади. 

“Uzbek Tigers” боксчилар клуби 2016 йилда ташкил этилди. VII фаслда унинг таркибига 30 нафар боксчи киргани маълум бўлди. Улар орасида 2016 йил Олимпия ўйинлари олтин медал соҳиблари Ҳасанбой Дўсматов (49 кг) ва Шаҳобиддин Зоиров (56 кг), шунингдек, кумуш медал соҳиблари Бектемир Меликўзиев (56 кг) ва Шаҳром Ғиёсов (69 кг) ҳамда бронза медали соҳиби Муроджон Аҳмадалиевлар (69 кг) бор.

WSB AIBA Бутунжаҳон Бокс Серияси VII фаслнинг учта гуруҳи 12 та жамоадан иборат. “Uzbek Tigers” «С» гуруҳида “China Dragons” (Хитой), “Patriot Boxing Team” (Россия) ҳамда “Astana Arlans Kazakhstan” (Қозоғистон) жамолари билан бир қаторда рингга тушадилар. Боксчиларимиз шу пайтга қадар “Astana Arlans” ҳамда “China Dragons” жамоалари билан меҳмонда жанглар ўтказдилар.

The World Series Boxing (WSB) Бутунжаҳон Бокс Серияси чемпионатининг VII фасл учинчи босқич таркибида Ўзбекистон шаънини ҳимоя қилувчи боксчилар BUKA Boxing Sportswear томонидан тақдим этилган кийимда рингга чиқадилар.

Бокс кечаси 4 март 19:00да “Спорт” телеканали орқали жонли эфирга узатилади. 

Кун.uz таҳририяти боксчиларимизга омад тилайди.