Россиянинг Камчатка ўлкасида ҳужжатларни сохталаштирган ва улардан фойдаланган Ўзбекистоннинг уч нафар фуқаросига нисбатан жиноий ишлар қўзғатилди. Бу ҳақда ўлка полицияси ахборот хизмати хабар берди.

Ўзбекистонлик 24 ёшли йигит ўз юртдошларига сохта ҳужжатларни тайёрлашда кўмаклашган. У 20-25 минг рубль эвазига уларнинг паспортлари ва миграция карталарида чегарадан ўтганлик ҳақида муҳрлар қўйиб берган.

Ёш йигитнинг таъкидлашича, Москвада “енгил йўл билан пул топиш усулини” таклиф қилган эркак билан танишиб қолган. Тезкор ходимлар Москвадан бўлган “Остап Бендер”нинг шахсини аниқлашмоқда. Гумонланувчининг сўзларига кўра, айнан ўша эркак ноқонуний бизнес ташкилотчиси саналади.

Ўзбекистонлик йигит ҳужжатларни сохталаштириш, тайёрлаш ёки ўтказиш жиноятида иштирок этишда гумонланмоқда. Россия ЖКнинг бу моддаси 2 йилга озодликдан маҳрум этиш жазосини назарда тутган.

Ҳамюртининг хизматидан фойдаланган 36 ва 23 ёшда бўлган Ўзбекистоннинг икки нафар фуқаросига сохта ҳужжатдан фойдаланиш бўйича айблов қўйилди. Улар 6 ойгача қамалиши мумкин. Бироқ, Россиядаги амалдаги қонунчиликка кўра, бу муҳожирларга нисбатан жиноий ишлар уларнинг ўз айбини тан олганликлари туфайли тўхтатилиши ҳам эҳтимолдан холи эмас.