Япония бош вазири Синдзо Абэ япон ҳукуматининг АҚШга ташрифи давомида президент Дональд Трамп билан бўлган гольф ўйини натижаларини ошкор этишни истамади. Kyodo агентлиги шу ҳақида хабар берди. 

"Ким ғолиб бўлгани - давлат сири ҳисобланади, - дея ҳазиллашди Абэ. - Бироқ жаноб Трамп ҳақиқатда ажойиб ўйинчи экан". Шу вақтнинг ўзида Япония бош вазири унинг ўша кунги энг биринчи зарби "бутун ҳаётидаги энг яхши беш зарбидан бири" бўлганини таъкидлаган. 

Манбага кўра, Дональд Трамп билан ўтган гольф ўйини мавзуси бундан аввал Абэнинг ҳукмрон коалиция вакиллари билан кечки овқат устида учрашганида ҳам кўтарилган. Унда бош вазир ўз ватани ва хорижда жиддий танқидга йўлиққан АҚШ президенти билан бундай норасмий вазиятда учрашишини кутмагани ҳақида сўзлаган. Шунда Абэ гольф ўйини вақтида Трамп икки марта тўпни нишонга урганини айтган. 

Абэ ва унинг Трамп билан ишончли муносабат ўрнатиш нияти бош вазирнинг сиёсий рақиблари томонидан танқид остига олинди. Япон мухолифат партия вакилларининг фикрича, АҚШнинг амалдаги президенти билан ҳаддан зиёд яқин алоқалар Япониянинг Европа мамлакатлари билан муносабатларига путур етказиши мумкин.

Синдзо Абэнинг Қўшма Штатларга ташрифи февралнинг биринчи ярмида амалга оширилиб, икки қисмдан иборат бўлди. Биринчи куни томонлар Вашингтонда музокаралар ўтказишди, шундан кейин Абэ ва Трамп Америка президентига тегишли Палм-Бичдаги "Мар-аЛаго" масканига йўл олишди. Бу ерда икки давлат етакчиси гольфда беллашишди.